Yaranma tarixi

Azərbaycan İnşaat Mühəndisləri Universiteti (AzİMU) 1920-ci ildən Bakı Politexnik İnstitutunun tərkibində inşaat fakültəsi, 1930-1934-cü illərdə müstəqil İnşaat və Me’marlıq İnstitutu, 1934-cü ildən Azərbaycan Sənaye İnstitutunun, 1951-ci ildən isə Azərbaycan Politexnik İnstitutunun tərkibində inşaat-me’marlıq yönümlü ixtisasları birləşdirən bir neçə fakültə kimi fəaliyyət göstərmişdir. 1975-ci ildə Azərbaycan Respublikası Nazirlər Kabinetinin qərarı ilə Azərbaycan İnşaat Mühəndisləri İnstitutu yaradılmışdır. 1992-ci ildə institut universitet statusu almışdır. AzİMU inşaat sahəsində Zaqafqaziyada ilk və hələlik yeganə ali təhsil müəssisəsidir. Universitet indiyə qədər 25 mindən çox yüksəkixtisaslı me’mar və inşaatçı-mühəndis hazırlamışdır. 2000-ci il iyun ayının 13-də Azərbaycan Respublikasının prezidenti Heydər Əliyevin Fərmanı ilə bu ali məktəb Azərbaycan Memarlıq və İnşaat Universiteti adlandırılmışdır.

Ümumi məlumat

Mühəndis kadrlarının hazırlanması ilə 700 nəfərdən ibarət professor-müəllim hey’əti məşğul olur. Bunlardan 100 nəfərdən çoxu elmlər dokturu, professor, 400 nəfərdən çoxu elmlər namizədi, dosent və baş müəllimdir. Onlarla yanaşı respublika tikinti kompleksinin aparıcı mütəxəssisləri də tədris prosesinə cəlb edilmişdir.

Universitetdə 42 kafedra fəaliyyət göstərir. Bunlar sosial-siyasi və humanitar, ümumi elmi, ümumi texniki və ixtisas kafedralarına bölünür.

Universitetin maddi-texniki bazası ildən ilə möhkəmlənir. Hazırda ali məktəbin ümumi sahəsi 49000 kv.m olan 5 tədris korpusu vardır. Auditoriya fondunun genişlənməsilə bağlı bir çox kafedralar müasir avadanlıqlarla, kompüterlərlə təchiz olunmuş, tədris və elmi tədqiqat laboratoriyaları yaradılmışdır. AzİMU-nun Musabəyov qəsəbəsində yerləşən tələbə şəhərciyində 5 yataqxana korpusu, o cümlədən xarici tələbələr üçün ayrıca doqquz mərtəbəli 2 yataqxana korpusu vardır.

Tələbələr burada dərslərə hazırlaşmaqla bərabər öz asudə vaxtlarını da xoş keçirə bilirlər. Bunun üçün onlar burada "OCAQ” tələbə klubu, şahmat klubu, idman meydançaları, "Çənki” kinokonsert salonu və tələbə kafesindən istifadə edə bilirlər. Tələbə şəhərciyində sanatoriya-profilaktoriya fəaliyyət göstərir. Universitetin nəzdində tələbə poliklinikası, əsaslı kitabxana, tədris korpuslarında şö’bələri və oxucu salonları, aspirantura şö’bəsi, elmi tədqiqat bölməsi, istehsalat təcrübə şö’bəsi vardır. Öz səhifələrində Universitet həyatını işıqlandıran "İnşaatçı kadrlar” adlı çoxtirajlı qəzet buraxılır.

Fakültələr

Tikintinin iqtisadiyyatı və idarə edilməsi
Bələdiyyə tikintisi və təsərrüfatının iqtisadiyyatı və idarə edilməsi
Menecment (inşaatda)
Marketinq (inşaatda)
Me’marlıq
Me’marlıq mühitinin dizaynı
Me’marlıq abidələrinin bərpası və yenidən qurulması
Bağ, park və landşaft quruculuğu
Sənaye və mülki tikinti
Hidrotexniki tikinti
Bələdiyyə tikintisi və təsərrufatı
Meliorasiya mühəndis sistemlərinin tikintisi
İstilik qaz təchizatı və ventilyasiya
Su təchizatı və suayırma
Dəmir yol tikintisi və təsərrüfatı
Avtomobil yolları və aerodromların tikintisi
Körpülər və nəqliyyat tunelləri
Tikinti materialları, mə’mulatları və konstruksiyalarının istehsal texnologiyası
Ağac e’malının texnologiyası
Çətinəriyən qeyri-metal və silikat materiallarının texnologiyası
Tətbiqi geodeziya
Tikinti və tikinti materialları sənaye müəssisələrinin elektrik təchizatı.
İnşaatda texnoloji proseslərin və istehsalın avtomatlaşdırılması.
İnşaat, yol maşın və avadanlıqları
Tikinti materialları və mə'mulatları sənayesi müəssisələrinin maşın və avadanlığı
Tikinti və tikinti materialları sənayesi müəssisələrinin texnoloji, nəqliyyat maşın və avadanlağının texniki istismarı və servis xidməti
Materiallar fizikası (inşaatda)
Materialşünaslıq və yeni materiallar texnologiyası (inşaatda)
Mexanikləşdirmə və avtomatlaşdırma (inşaatda)
Hidrotexniki və meliorasiya mühəndis sistemləri tikinti işlərinin mexanikləşdirilməsi
Həyat fəaliyyətinin təhlükəsizliyi (inşaatda)
Su ehtiyatlarının mühafizəsi və kompleks istifadəsi